Meeqqat tamarmik angerlarsimaffeqarneq pisinnaatitaaffigaat
Suliniutit annertuut aappaat tassaavoq Meeqqat tamarmik angerlarsimaffeqarneq pisinnaatitaaffigaat, taanna suliniutaavoq sammisat pitsaasut isumallillu aqqutigalugit, meeqqat angerlarsimaffiup avataanut inissitat angajoqqaallu ataatsimoornerisa nukittorsarneqarnissaannik siunertalik. Namminneq piumassutsiminnik sulisugut sammisassaqartitsisuussapput arlaleriarlutillu Red Barnet Danmark-imi siunnersuisumit sungiusarneqassallutik. Angajoqqaallu meeqqatillu ataatsimoornissaq pillugu tarnip pissusaanik immikkut ilisimasalimmit pikkorissarneqarnissamik neqeroorfigineqassapput.
“Meeqqat tamarmik angerlarsimaffeqarneq pisinnaatitaaffigaat” qulequtsiullugu misiliutigalugu suliniummik Nuummi pilersitsinikkut, meeqqat angerlarsimaffiup avataanut inissinneqartut imminut tatiginerat, inuttut inooqataanermi piginnaasaat, attaveqarsinnaanerat kiisalu pingaarnertut tungiuisuminnut pissusaat nukittorsarniarlugit, sunngiffimmi sammisassanut peqataanissaat Meeqqat Ikiortigit ikorfartussavaat. Angajoqqaatut aaqqissuulluakkanik sammisaqartinneqarnikkut ilinniagaqassutsimillu toqqamaveqarluni tapersorneqarnikkut aaqqissuussamik ataatsimoorneq, meeqqat angerlarsimaffiup avataanut inissinneqartut taakkulu angajoqqaavisa nuannersunik misigisaqarnissaannut ikorfartuutaasutut annertuumik iluaqutaasinnaavoq taamaaliornikkullu meeqqat siunissami inuunerissusaat ineriartornerallu nukittorsarneqassalluni.
Kommuneqarfik Sermersuumi ukiumut meeqqat 300-it missaat angerlarsimaffiup avataanut inissinneqartarput. Suliniummi ukiumut meeqqat angerlarsimaffiup avataanut inissinneqartut arfinilinniit qulit tungaannut amerlassusillit angajoqqaaminnut pissusaasa nukittorsarneqarnissaat anguniarneqassaaq.
Najoqqutassamik nunatsinni kommuninut tamanut tunniunneqartussamik inerisaanissaq siunertaavortaaq. Meeqqat angerlarsimaffiup avataanut inissinneqartut angajoqqaavisalu isumalimmik ataasimoortinnissaannut immikkoortut pingaarutillit tamaasa najoqqutassap imarai. Kommunip meeqqanut angerlarsimaffiup avataanut kiisalu ulloq unnuarlu angerlarsimaffinnut inissinneqartunut suliat nangillugit ingerlatsinissaani ikorfartuinissaq siunertaavoq.
