Kalaallit Nunaanni Meeqqat Ikiortigit

Kalaallit Nunaanni Meeqqat Ikiortigit

Kalaallit Nunaanni Meeqqat Ikiortigit nunatsinni meeqqanut tamanut pitsaasumik toqqissinartumillu inuuneqarnissamik qulakkeerinissamik suliniuteqarpoq. FN-ip meeqqat pillugit isumaqatigiissutaa eqquutsinniarlugu kalaallillu meerartaasa pisinnaatitaaffiisa ataqqineqarnissaannik suliniuteqarnikkut taamaaliorpugut. Meeqqanut ilaqutaannullu isumalinnik pilersitsinikkut taamaaliorpuguttaaq. Nunatsinni meeqqanut tunngatillugu iliuusissanik attanneqarsinnaasunik pisariaqartitsinerup eqquutsinnissaa kissaatigaarput.

Kalaallit Nunaanni meeqqat ataasiakkaat peqataanissamut, aniguinissamut, ineriartornissamut illersorneqarnissamullu pisinnaatitaafiisa piviusunngortinnissaannut tapersersuinissarput anguniagassatut takorluugaraarput. Isumarput naapertorlugu meeqqat tusaaneqarlutillu isigineqartussaammata, meeqqap isummaminik annissisinnaanissamut pisinnaatitaaffiata Kalaallit Nunaanni inuiaqatigiinni oqallinnermi atuutsinneqarnissaa suliniutigaarput. Nunatta meerartaasa inuunerissuunissaat ineriartornissaallu immikkut qitiutillugit nukittorsarnissaat anguniagassatut siunniupparput. Inuiaqatigiinni unammilligassat taakkulu meeqqat atugaannut, inuunerissusaannut ineriartornerannullu sunniutaat oqaasinngortippagut.
Meeqqat Ikiortigit ikiuiniaqatigiinnik Kalaallit Nunaannik nukittunerulersitsiniarlutik suliniuteqartunik annertuumik pingaartitsisuupput. Isumarput naapertorlugu kivitseqatigiinnikkut annertunerusumik angusaqarsinnaavugut. Taamaammat nunatsinni pisortatiguunngitsumik suliniaqatigiiffinnut allanut attaveqarluarpugut, inuaqatigiinnilu aalajangiisartunik uummaarissumik ataavartumillu oqaloqateqartarneq suliniutigaarput. Isumarput naapertorlugu meeqqamik perorsaanermi inuiaqatigiit pisariaqartinneqarput innuttaasullu, nammineq piumassutsiminnik sulisut pisortallu ataatsimoornitsigut meeqqanut pitsaanerpaanik angusaqarsinnaavugut.