Maanna ukkatagut

2017-imiit 2021-imut pingaarnertut salliussagut pingasut tassaapput:

  • Meeqqat tamarmik angerlarsimaffeqarneq pisinnaatitaaffigaat qulequtsiullugu suliniut
  • Suliniut Chat Paaralugu
  • Aaqqissuussaanikkut inerisaaneq

Chat Paaralugu 2018-imi septembarip qeqqani saqqummiuteqqaarneqarpoq nittartakkatsinnilu matumani nassaassaalluni. Chat Paaralugu qulequtsiullugu suliniummi meeqqanik, inuusuttunik, angajoqqaanik ilinniarsimasunillu isumannaannerusumik teknikkip digitaliusup silarsuaaniinnissamut siunnersuinissaq ilitsersuinissarlu siunertaavoq.

Meeqqat tamarmik angerlarsimaffeqarneq pisinnaatitaaffigaat sammisaqartitsinermut ikaarsaalerpoq. Sammisat pitsaasut isumallillu aqqutigalugit meeqqat angerlarsimaffiup avataanut inissinneqartut angajoqqaavisalu akornanni ataatsimoornerup nukittorsarnissaa suliniummi siunertaavoq. Suliniut pillugu immikkoortumi paasisaqarnerusinnaavutit.

Suliniutit aallartinneqareerput aaqqisuussaanikkullu inerisaaneq ukiuni tulliuttuni ingerlanneqassaaq.

Aaqqissuussaanikkut inerisaaneq

Aaqqissuussaanikkut inerisaaneq pingasunik pingaarnertut immikkoortortaqarpoq: Attaveqatigiinneq, najukkami aallaaveqarneq namminerlu piumassutsimik sulineq.
Attaveqatigiinneq pillugu anguniagassatut siunniussinerput paasititsiniaanernik, inerisaanermik ass. meeqqat pisinnaatitaaffii pillugit allagartarsualiornernik, meeqqat ulluannik assigisaannillu sammisassanik aalajangersimasunik ukkassinermik kinguneqarpoq. Oqariartuutigut sapinngisamik innuttaasunut amerlanerpaanut anngunniarlugit -inuit akunnerminni attaveqatigiittarfii ilanngullugit- tusagassiorffinni saqqumilaarniarpugut. Iliuuserisatta sunniutaat pingaartumik suliniutigut annertuut uppernarsaasiortarpagut misilittakkatsinnillu, ilaatigut pisimasunik saqqummiussinerit aqqutigalugit, avitseqatigiittarluta. Suliatsinnut suliniutitsinnullu tunngatillugu najukkani aallaaveqarneq najukkami suleqateqarnissamik kinguneqarpoq. Aningaasarsiutiginagu suliniaqatigiiugatta sulinerput pingaarnertut nammineq piumassuitsimik tunngaveqarpoq. Nammineq piumassutsiminnik sulisunik attaveqatigeeqarpugut sulisussarsiornermik, ilinniartitsinermik, sungiusaanermik namminerlu piumassutsimik sulinerup pitsaassusaanik qulakkeerinermik suliaqartuulluta.

Pingaarnersiukkat pingasut taakku saniatigut immikkut iliuuseqarfissatsinnik marlunnik toqqaavugut:

  • Kinguaassiuutitigut innarliinerit
  • Nikassaaneq

Iliuuseqarfissat taakku marluk, nunatsinni MIO-mi/meeqqat illersuisuanni sms-erluni siunnersuisarfimmik meeqqat inuusuttullu kinguaassiuutitigut innarliinerit nikassaanerlu pillugit saaffigisarnerusaannik naliliineq aallaavigalugu, toqqarpagut.

Kinguaassiuutitigut innarliinerit inuiaqatigiinni annertuumik ajornartorsiutaapput, sutigut tamatigut meeqqani ataasiakkaani inuiaqatigiinnilu ineriartornermik kigaallisitsisut. Nunatsinni meeqqat akornanni pingasut pallingajattut 18-iliitinnatik kinguaassiuutitigut innarligaasimapput. Ajornartorsiut taanna isiginngitsuusaaginnarsinnaanngilarput. Taamaammat nunatsinni Meeqqat Ikiortigit kinguaassiuutitigut innarliisarnerup unitsinneqarnissaa anguniarlugu sorsuppoq. Meeqqanik ikiuiniaqatigiit kiisalu pisortaneersut suleqatigalugit taamaaliorpugut. Sammisap ukkanneqarnissaa siunertaralugu politikerillu iliuusissatut neriorsuutiminnik eqqaasinneqartuaqqullugit, tusagassiorfinnut nalunaaruteqarnissaq tunuarsimaaffiginngilarput. Suliagut pillugit uani annertunerusunik paasisassarsiorit.
Nikassaaneq nunatsinni atuarfinni, sunngiffimmi ornittakkani, taamatullu meeqqanut inuusuttunullu neqeroorutini allani annertuumik ajornartorsiutaavoq. Nikassaanerup inuunerliorneq nassatarisarpaa meeqqallu ineriartorneranut sunniuteqarnerluttarluni. Atuarfinni, timersoqatigiiffinni internetsikkullu nikassaanerup akiorniarneqarnissaa pitsaalineqarnissaalu suliniutigaarput. Nikassagaanani peroriartorneq meeqqat tamarmik pisinnaatitaaffigimmassuk taamaaliorpugut. Meeqqat akornanni nikassaaneq annertuumik sunniuteqartarpoq. Meeqqat nikassarneqartut tamarmik tamanna inuunermik sinnera nassatarisarpaat. Nikassaanermut peqatigiumaneqannginnermullu sakkussaq pitsaanerpaaq tassaavoq meeraqatigiinni akuersaartuni meeqqanik ajunngitsumik tapersersuineq. Nunatsinni Meeqqat Ikiortigit nikassaaneq akiorniarlugu sulivoq; ilaatigut unnukkut sammisaqartitsisarnikkut nikassaannginnissaq anguniarlugu iliuuseqarnikkut, soorlu Kammagiitta aqqutigalugu taamaliortugut.