Atuarfimmi nukarliit nittartakkanut pingaagata
- angajoqqaanut ilitsersuusiat pitsaasut
Meeqqanut arfinilinniit qulingiluat akornani ukiullit internet-ip nittartagaanni atuineq pinnguaatinut tunngassutillit atorneqartarput, meeraqatiminnik attaveqaqatigiinnikkut. Pinnguaatit oqaatsit assillu atorlugit meeqqat kinaassutsiminnik pilersitsiartorfigisaminnik aammalu piginnaasaminnik ineriartorfigisamminnik. Meeqqat pinnguarneq utitsinneq ajorpaat. Pinnguarnerat allatut isikkoqaliinnartarpoq.
Aliikkusersuineq pinnguarnerlu
Meeqqat attaveqaatit atorlugit aliikkusersortarput, pinnguarlutik eqqissisimaarlutillu. Angallattakkat avammut internetsimut attaveqaatit atorneqartarput sumiluunniit qaqugukkulluunniit. Taamaattumik nalinginnaasarpoq meeqqat arlaannut atortutik nassarlugit pulaartarnerat.
Youtube nuannarineqarluarneqarpoq meeqqani, tassanimi pinnguaatinut assigiinngittunut, pinnersarnermut, skater-tarnermut iliuuserisinnaasat aammalu qitittariaatsinut isumassarsiaasinnaapput video-aqqani. Meeqqat pinnguarsinnaanissaminnut ilisimasassanik isumassarsiffingisinnaasaminnik pisariaqartitsisarput. Pinnguarneq tamatigut nammineq imminik pilersinneqarneq ajorpoq. Minecraft-imut pinnguarusukkaanni kusanartunilluunniit perlarnernik sanarusukkaanni ikiortissaqaranilu taava Youtube aqqutigalugu ilitsersuinertalimmik ikiorneqarsinnaapput. Meeqqani amerlasuuni pinnguaatit spil-it atorneqartaqaat, annermik arfinilinniik qulingiluat tungaanut ukiulinni. Spil-ini pinnguaatini meeraqatiminnik attaveqartarput.
Ilaatigullumi aamma spil-ini attaveqaatitigut toqqaannartumik oqaloqatigiillutik naapittarput, imminnut unamminermikkut imaluunniit illersoqatigiillutik pinnguarnermikkut. Spil-it ilaanni ataatsimoorlutik pinnguarnermikkut point-inik katersueqatigiittarput. Assersuutitut atorneqarsinnaavoq pinnguaatit angallattakkat ipad-it meeqqat meeraqatitillu paarlaassinnaasarput spil-inilu killiffiminnik ingerlaqqittarlutik ikioqatigiillutik. Atuarfinni sunngiffimmilu ornittakkani takussaakkajuppoq, meeqqat pinnguaatit atorlugit katersuuffeqartarnerat, imminnullu ikioqatigiillutik siunnersoqatigiillutik ataatsimoorfeqartarput. Inersimasunut pingaaruteqarpoq paasinnissalluni takusinnaallugulu tamakkua nittartakkani orninneqartartut ataatsimoorfiit meeqqanut pingaaruteqarsinnaammata, aammattaaq pingaaruteqarpoq inersimasutut akisussaaffimmik tigusilluni killiliisinnaaneq, meeqqat qanoq sivisutingisumik attaveqaatit atorlugit pinnguaatinik spil-inik atuinissaannut killiliisinnaanermik.
Internet-simi kammalaatit
Meeqqat tarrarsorlutik imminnut isigisarnerat
Meeqqat internetsikkut attaveqaatit nittartakkanillu atuinermikkut kinaassutsiminnut pingaaruteqartumik imminnut isiginnittaatsimik tunngaviliisarput. Inuusuttuaranngulerneq sioqqullugu ukiuni taakkunani assigiinngittut kinaassutsit misilittarneqartarput, soorlu assersuutingineqarsinnaavoq meeqqat takorluuillutik pinnguarnermikkut erinarsortartutut, arsaattartutut pinnguarnermikkut takutittarpaat, nittartakkatigullumi pinnguarnitik saqqummersinnaasarlugit. Meeqqat ilaasa sinnattorisinnaasarpaat internet aqqutigalugu tusaamasanngornissartik.
Nutaajunngilaq inuttut tamatta immitsinnut tarrarsortutut isigisinnaasarnerput. Saqqumminerusumilli tarrarsorsinnaanngornikuuneq nutaajunerulernikuuvoq, tassami tarrarsorsinnaaneq avammut periarfissanngornikuummat
– tassaanilu takuneqarsinnaanngornikuulluni avammut ikkussimasat kammalaatit oqaasertalerneqarneri nuannarineqarnerilu kisitsisinngorlugit takuneqarnerisigut. Ajoraluartumillu avammut nittartakkat atorneri aamma nuanninngittunik pilersitsinnaapput nuanniittumik oqaasertaaliinerit meeqqanut avaanngunartunngorsinnaammata. Pingaaruteqarpoq meeqqanut meeraqatiminnik qanoq isigineqarnerat, inersimasut akuersaarneqarnissaa, aammalu imminnut naleqartinnerat qanoq nukittorsarneqarnissaa avammut nittartartakkat atorneqanngikkaluartut. Pingaaruteqarpoq meeqqanik oqaloqateqarsinnaanissaq, meeqqat tamarmik imminnut assiliniartariaqanngittut aammalu meeraq imminik naammangisimaasinnaanissaa allanngunngikkaluarluni.
Meeqqat suli meeraapput
Meeqqat inooqatinut attuumassuteqarnera ineriartorneralu pinnguarnerit ileqqorisaani tunngaviusumik allanngorneq ajorput. Inooqatigiit iluanni imminnut atassuteqarnerit meeraqatigiinni piuarsimavoq. Assigiinngissutaasorli siornatigumiit massakkumut tassaavoq, avammut nittartakkatigut kikkut tamarmik, inersimasut akornani aamma, takuneqarsinnaanngornikuummat. Ernumassutit ilangisinnaavaat, meeqqat suut misilittagarineraat avammut nittartakkat iluanni.
Qanoq oqaloqatigissavara meeraq nittartakkami isersimanerup iluani inuuneq pillugu?
Illit nammineerlutit nittartakkani assigiinngittuni imaluunniit spil-ertarfinni profil-eqanngikkuit nalunarsinnaasarpoq meeqqat malinnaaffingissallugit qanoq oqaluusserinnittarnerat imaluunniit allannik tagger-isinnaanerannik. Meeqqat tapersersorneqarluarnissartik angajoqqaaminnik pisariaqartittarpaat, pingaartumik ukiuni siullerni nittartakkamik atuilernermi. Piffissaq spil-inut pinnguarnermut aammalu pinnguaatini angallattakkani atorneqartartoq kisimiiffissatut atorneqartuartartussaanngilaq. Isumassarsiatsialaavorlu angajoqqaatut meeqqap suut apps-it spil-illu atorneqartarnersut pinnguaatitut.
Nammineerlutit avammut nittartakkani internet-sini akuullutit peqataaguit meeqqamut malinnaasinnaallutit, taava aamma periarfissaqassaatit meeqqavit qanoq allanut attaveqartarnissaanut. Uanimi pineqarmat illit nammineq soqutiginninnerit qanoq meeqqavit internetsikkut attassuteqarnerup iluani qanoq pissusilersortarnersoq soqutiginnittumik takutitsisarnissat taassumallu iluani ataavartumik siunnersuillutillu periarfissat ajornartorsiutaasinnaasullu malinnaaffigisinnaanissai pineqarmata. Pissuserissaartumik oqaloqateqarsinnaanermik meeqqamut pilersitsiguit aamma meeraq ilinniartinneqassooq qanoq meeraqatinut pissusserissaartumik atassuteqartarnissannut.
Piffissamik killiliisinnaaneq aammalu avammut atassuteqaateqanngittumik inissaqartitsineq
Internet tassaavoq pinnguarfissaq annertooq, ilaatigullu tiguartiffingineqarsinnaasoq aammalumi angajoqqaanut paarsisussatut atorneqartartoq. Meeqqalli minnerusut qaratsaminnik timiminnillu aalariaatsip aqulluarnissaanut ineriartortitsisinnaanissaminnik pisariariaqartitsisarput aalanermikkut. Peqqinnanngillaq isiginnaagassiarisartakkap skærm-ip saavani ulloq naallugu atorneqartassappat. Piffissaqartariaqarput meeqqat inooqateqarnerup pissussaanik timillu pisinnaasaanik ineriartortitsinnaannissaanik pilersitsinissaq avammut nittartakkakkut atuinngikkaluarluni.
Nittartakkanik atassuteqarneq internet atorlugu piffissaliisinnaaneq isumassarsiatsialaavoq. Meeqqat nammineerlutik aamma killileeqartaasarnissaat qanoq sivisutingisumik internet atorlugu atassuteqarnissaq ilaaffingisariaqarpaat. Taamaalillutik meeqqat tusaaneqartutut misigissapput aammalu nammineq killiliussarititaasut ataqqilluarnerussavaat. Killiliussarititat tassaasinnaapput, qanoq sivisutingisumik qanorlu spil-ertoqartarnissaa. Ilisimatuut unnersuussutigivaat meeqqat arfiniliinniik qulingiluat akornanni ukiullik annerpaamik 1-2 tiimi atorneqartassasoq ullormut. Sapaatillu akunneri naajartulerneranni sulinngiffeqarfinnilu sivisunerulaartarsinnaasut. Isumassarsiatsialaavorlu neriffiup nalaani, sapaatit akunnerisalu naajartulernerini avammut atassuteqaateqanngittumik aammalu oqarasuaatit angallattakkat atortannginnissaanut inissaqartitsisarnissaq ilaqutaariit tamarmiullutik atortassagaat.