Piumassutsiminik sulisumik nersorinninneq

Kalaallit meerartaannut sunniuteqarluartumik piumassutsiminnik uummateqarfigalugu pimoorussillutik suliniuteqartut.

Meeqqat Ikiortigimmi meeqqat ilaqutariillu mianerisassat siunniuteqarluartumik sullinneranni nammineq piumassutsiminnik sulisut peqatigiiffimmi suliatsinni pingaartuupput pinngitsoorneqarsinnaanatillu.

 Meeqqat Ikiortigimmi nammineq piumassutsiminnik sulisut suliaat sammisassaqartitaallu assigiinngitsuusarput; nunamut pisuttuarneq, angalaarneq, aalisariarneq, sap. akunneri tamaasa badmintonertitsineq, nalukkianeq, nalliuttorsiornernilu,soorlu: juullerpalaartitsineq, halloweernertitsinerlu. Nammineq piumassutsiminnik sulisut nammineerlutik soqutigisatik piginnaasatillu aallaavigalugit sammisaqartitsisarput. Saniatigullu illoqarfimmi pisinarfiit peqatigiiffiillu assigiinngitsut tapersersuisarput, illoqarfiullu immikkoortortaqarfiani pisassaqartitsitaannut tunissuteqartarlutik. 

Meeqqat Ikiortigimmi piumassutsiminnik sulisut tamaasa nalliusserusullugit, qujassuteqarniarlutillu Meeqqat Ikiortigimmi siulersuinerit 2017-imili ukiumoortumik piumassutsiminik sulisumik nersorinninneq aaqqissuuttalerpaa. 

Unnussiuaartitsinermilu ukiumi immikkut ittumik suliniuteqarsimasoq, piumassutsimik suleqatiminit innersuunneqarsimasoq nersorneqartarpoq.

PIUMASSUTSIMINIK SULISUMIK NERSORINNINNEQ UKIUT TAMAASA NOVEMBERIMI PISARPOQ

2017imi 2018imi nersonaat tunniunneqartoq kusanarluinnartoq Dooit Designimit sananeqarlunilu tunissutigineqarpoq. Taannalu qujassutigeqarput. Dooit Design suliai ugguuna takusinnaavasi:

facebook.com/dooitdesign

 

2019imi nersorinninneq

Ukioq mannalu annertut malunnartinniarneqarpoq nersornaaserneqartoq  Marie Louise Brandt ukiorpassuarni suleqataasarsimanera pillugu. Nersornaasiissullu pivaa inuugami tatiginartoq, inussiarnersoq suliaminullu tunniusimasuusoq. Marie Louise ukiorpassuarni Nuummi peqatigiiffimmi siulersuisunut ilaalluni sulisimavoq aaqqissuussatullu ingerlanneqartuni peqataasarsimalluni.

 

2019imi nersorinninneq

Ukiumoortumik nersorinninniarnermi immikkut suliat malunnartinneqarput, tassanimi Petrine Andersen nersornaatisimmat. 

Petrine suliaminut unneqqarilluni tunniusimasuummat, pilersaarusianullu assigiinngitsuni aallartitsisuulluni, soorlu sap. akunneri tamaasa badmintornertitsinermi, nersornaat tunniunneqarpoq. 

 

 2018imi nersorinninneq

Illoqarfimmi immikkoortortami aningaaserisoq, Rebekka Olsvig, qasusuilluni ukiorpassuit piumassutsiminik sulisarnerminik 2018imi nersorniarneqarpoq. Nersornaasiisarnerup nalliuttorsiortitsisarnerullu siunertarivaa piumassutsiminnik suliaat tunniusimalluarnerallu qujaniutiginissaat. 

Immikkullu piumassutsimik sulinerup maluginiarnerarnerulernissaa nersornaasiinerup siunertaasa ilagivaat. 

 2017imi nersorinninneq

2017imi nersornaat Nuummi immikkoortortaqarfimmi siulittaasumut Lars Peter Danielsenimut tunniunneqarpoq. Tassanilu peqqutigineqarpoq ukiorpassuit tunniusimalluni kalaallit meerartaat inuusuttaallu sullittarsimammagit. 

Ukiorlu taanna Rebekka Olsvig peqatigalugu piumassutsiminnik sulisimanerminnik ukiut 12-inngortorsiornerminnik nersornaatisipput.