Meeqqat Ikiortigit sulinerat Naalagaaffiit Peqatigiit Meeqqat pillugit Isumaqatigiissutaannik, 54-inik immikkoortoqartumik, tunngaveqarpoq:
”Aalajangiisoqassatillugu inuiaqatigiit
meeqqamut pitsaanerusussamik
qulakkeerinnissapput.
Naalagaaffik meeqqamut illersuisumik
immikkut malittarisassanik
aalajangersaanissaminut pisussaaffeqarpoq”
Artikeli 3
”Meeqqap angajoqqaaminik
najugaqateqarnissamik pisinnaatitaaffia,
tamanna meeqqap
pisariaqartitaanut akerliusutut
nalilerneqarsimanngippat. Meeqqap
angajoqqaani illugiissillugit
attaveqarfigiinnarnissaannut
pisinnaatitaaffia, taakku arlaat
imaluunnit tamaasa avissaaqqagunigit.
Attaveqarnermik taamaattumik
pilersitseqqinnissamik
Naalagaaffiup pisussaaffeqarnera,
avissaarsimaneq Naalagaaffiup
suliniuteqarneratigut pisumik pissuteqarpat”
Artikeli 9
”Pisinnaatitaaffiit meeqqanut
tamanut, minitaasoqarani,
atuupput. Meeqqat immikkoortitaanernut
qanorluunniit ittunut
tamanut nunagisanit illersorneqassapput”
Artikeli 2
”Meeqqap eqqissisimaarnissamut,
sunngiffeqarnissamut aamma
kulturikkut pinngorartitsillunilu
sammisaqarnissamut pisinnaatitaaffia”
Artikeli 31
”Meeqqap peqatigiiffimmut ilaasortaalluniluunniit
peqatigiiffimmik
aallartitseqataanissaminut
pisinnaatitaaffia, tamanna allat
pisinnaatitaaffiinik, imaluunniit
nunat aamma tamat eqqarsaatigalugit
unioqqutitsisuunngippat”
Artikeli 15
”Meeqqap angajoqqaanit imaluunniit
allanit naalliutsinneqarnernut
sunulluunniit illersorneqarnissaanik
Naalagaaffiup pisussaaffeqarnera,
aamma naalliutsitsinernut
sunulluunniit pinaveersaartitsinissaq,
pisimappallu tamatuma
kingunerluutaanik ikiuinissaq”
Artikeli 19
”Meeqqat sumiginnarneqartut,
naalliutsinneqartut imaluunniit
atornerlunneqartut naleqquttumik
ikiorneqarnissaannik qulakkeerinninnissamik
Naalagaaffiup
pisussaaffeqarnera, taamaaliornikkut
taakku inuiaqatigiinnut
akuleruteqqissinnaaqqullugit”
Artikeli 39
”Meeqqap misigissutsiminik
aamma isummaminik oqaatiginnissinnaatitaanera,
tamanna allat
pisinnaatitaaffiinik, naalagaaffiup
isumannaatsuunissaanik imaluunniit
eqqissimatitsinissamik
unioqqutitsisuunngippat. Meeqqap
paasissutissanik ujartuinissamik,
tunineqarnissamik aamma
ingerlatitseqqinnissamik pisinnaatitaaffia”
Artikeli 13
”Meeqqap isummaminik oqaatiginninnissaminut
pisinnaatitaaffia,
aamma isummap taassuma
meeqqap ukiuinut inerisimassusianullu
naleqquttumik ataqqineqarnissaanik
pisinnaatitaaffia”
Artikeli 12
”Meeqqap innarluutillip pitsaanerpaamik
ikiorneqarnissamik,
isumassorneqarnissamik aamma
ilitsersorneqarnissamik pisinnaatitaaffia,
meeqqap sapinngisamik
annerpaamik imminut tatiginissaa
aamma imartuumik eqeersimaartumillu
inuneqarnissaanik
periarfissaqarnissaa qulakkeerniarlugu”
Artikeli 23
”Naalagaaffiit peqataasut qulakkiissavaat meeqqat pissutsini imminerminnut tunngasuni tamani meeqqat allat assigalugit killiligaanngitsumik isummaminnik saqqumiisinnaanerat, tassami meeqqat ukiuinut inerissimassusiannullu naleqquttumik isumaat naleqquttumik tusaaniarneqartussaammata aammalu qulakkiigassaralugu meeqqap innarluuteqarnerannut- ukiunillu naleqquttumik ikiorneqarnissaminut pisinnaatitaaffiata taassuma piviusunngortinneqarnissaa”
FN's Handicapkonvention artikeli 7
”Meeqqap atuartinneqarnissamik
pisinnaatitaaffia, aamma tunngaviusumik
pinngitsoorani aamma
akeqanngitsumik atuartitaanissaq
qulakkiissallugu Naalagaaffiup
pisussaaffeqarnera, aamma
atuarfiup ileqqutigut piumasarisai
inuttut naleqassutsimut naleqquttuunissaat”
Artikeli 28
”Meeqqap inuttut kinaassusiata
aamma piginnaasaasa ineriartortinnissaannut
atuartitaanikkut
ineriartortitseqataaffigineqarnissaa
inuiaqatigiit qulakkiissallugu
akisussaaffeqarnerat, meeraq inersimasunngoruni
eqeersimaartumik
inuuneqarnissaanut piareersarlugu,
inuit pisinnaatitaaffiinik ataqqinninnera
siuarsarlugu aamma
meeqqap nammineq kulturikkut
inuiaassutsikkullu naleqartitaanik
ataqqinninneq ineriartortillugu”
Artikeli 29
”Meeqqat angajoqqaaminnik ilaquttaminnillu annaasaqarsimasut immikkut illersorneqarnissaannik Naalagaaffiup pisussaaffeqarnera, aamma allatut iliorluni isumagineqarnissaannik imaluunniit meeravissianngortinneqarsinnaanerinik qulakkeerinninnissaq”
Artikeli 20
”Meeqqanut qitornarsianngortinneqarsimasunut imaluunniit ikiorserneqarnissaq siunertaralugu inissinneqarsimasunut atukkat pillugit Naalagaaffiup aalajangersimasumik naliliisarnissamik pisussaaffeqarnera”
Artikeli 25
”Meeqqap timikkut, tarnikkut, ileqqorissaarnikkut aamma anersaakkut ineriartornissamik qulakkeerinniffiusumik inuuniarnikkut atukkamigut pisinnaatitaaffeqarnera. Tamatuma aqqutissiuunnissaanut angajoqqaat pingaarnertut akisussaaffeqarnerat, aamma Naalagaaffiup ikiuunnissamik pisussaaffeqarnera”
Artikeli 27
"Meeqqap sapinngisamik pitsaanerpaamik
peqqissuseqarnissamik
pisinnaatitaaffeqarnera, aamma
pitsaaliuineq salliutillugu peqqinnissakkut
kiffartuussissutinik
aamma nakorsamit ikiorneqarnissamik
pisinnaatitaaffeqarnera.
Meeqqat toqusarnerisa ikilisinneqarnissaannik
Naalagaaffiup
pisussaaffeqarnera, aamma
ileqqutoqqat malillugit iliuuseqartarnerup
meeqqamut ajoqusiisinnaasup
atorunnaarsinneqarnissaanik
suliniuteqarnissaq”
Artikeli 24
”Meeqqap inuunissamut pisinnaatitaaffia,
aamma meeqqap inuuginnarnissaanut
ineriartornissaanullu
qulakkeerinninissamik
Naalagaaffiup pisussaaffeqarnera”
Artikeli 6
”Meeqqap kinguaassiuutitigut atornerlugaanissamut
aamma naalliutsinneqarnissamut
illersugaanissamik
pisinnaatitaaffia, tassunga
ilanngullugu atortittartuunermut
aamma pornonut peqataatinneqannginnissamut
illersugaanissaq"
Artikeli 34
”Meeqqap angajoqqavisa imaluunniit
angajoqqaatut akisussaasuutitaasut
meeqqap perorsarneqarneranik
pingaarnertut
akisussaasunerannik Naalagaaffiup
qulakkeerinninnissamik pisussaaffeqarnera.
Suliassap tamatuma
suliarinissaanut Naalagaaffiup
ilitsersuinermik aamma ikiuunnissamik
pisussaaffeqarnera”
Artikeli 18
"Angajoqqaat meeqqap piginnaasaanut
aamma ineriartornissamut
periarfissaanik naleqqunnerpaamik
ilitsersuinissamik akisussaaffeqarnerat
nunagisat ataqqissavaat”
Artikeli 5
”Isumaginninnikkut isumagineqarsinnaatitaanermik
meeqqap atorluaanissamik
pisinnaatitaaffia"
Artikeli 26
”Meeqqap ikiaroornartunik atuinissamut
illersorneqarnissamik pisinnaatitaaffia,
aamma taamaattunik
tunisassiornermut siammarterinermullu
ilaatinneqannginnissamut
illersorneqarnera”
Artikeli 33
"Meeqqap unnerluutigineqartup
pisuunnginnini uppernarsassallugu,
eqqartuussivimmi ikiorneqarnissamut
aamma naapertuilluartumik
eqqartuussivikkut suliaqarfigineqarnissamik
pisinnaatitaaffia. Inuusuttut
inatsisinik unioqqutitsisut
immikkut isiginiarneqarnissaannut
Naalagaaffiup pisussaaffeqarnera,
tassunga ilanngullugu pillarneqaataasussanut
tunngatillugu ukiukinnerpaaffiliinissaq.
Meeqqanut
iliuutsit kinguneqartinneqarnerat
pillaanermut sanilliullugu iluaqusiiniutitut
tunngaveqassapput"
Artikeli 40
”Meeqqap nammineq inuuneranut
sukkulluunniit imaluunniit
unioqqutitsisumik akuleruffigineqannginnissamut
illersorneqarnissamik
pisinnaatitaaffia, tassunga
ilanngullugu allakkanik isertuussisinnaaneq”
Artikeli 16
"Meeqqap inunngornerminit
ateqarnissamik inuiaassuseqarnissamillu
pisinnaatitaaffia"
Artikeli 7
”Isumaqatigiissutip matuma
imarisaata tamanit, inersimasut
aamma meeqqat akornanni,
nalinginnaasumik ilisimaneqalersinnissaa
pillugu Naalagaaffiup
pisussaaffeqarnera”
Artikeli 42