Kinguaassiuutitigut atornerluinerit inuiaqatigiinni annertuumik ajornartorsiutaapput, sutigut tamatigut meeqqani ataasiakkaani inuiaqatigiinnilu ineriartornermik kigaallisitsisut. Nunatsinni meeqqat akornanni pingasut pallingajattut 18-iliitinnatik kinguaassiuutitigut atorerlugaasimapput. Ajornartorsiut taanna isiginngitsuusaaginnarsinnaanngilarput.
Taamaammat nunatsinni Meeqqat Ikiortigit kinguaassiuutitigut atornerluisarnerup unitsinneqarnissaa anguniarlugu sorsuppoq. Meeqqanik ikiuiniaqatigiit kiisalu pisortaneersut suleqatigalugit taamaaliorpugut. Sammisap ukkanneqarnissaa siunertaralugu politikerillu iliuusissatut neriorsuutiminnik eqqaasinneqartuaqqullugit, tusagassiorfinnut nalunaaruteqarnissaq tunuarsimaaffiginngilarput. Suliagut pillugit uani annertunerusunik paasisassarsiorit.
Nunatsinni kinguaassiuutitigut atornerluisarnerup paquminarunnaarsinnissaa suliniutigaarput. Kikkulluunniit kinguaassiuutitigut innarlerneqarsinnaapput, taammaammat tamatta oqaluuserissavarput. Inuusuttut immikkut sanngiiffeqarput. Alapernaatsuupput atoqateqartarnermillu misileerusuttuunerat sanngiinnerulersitsisuulluni.
