Qanoq misinnarnera

Paasissutissat inummut tunngalluinnartut ilinnulluunniit tunngasut, assit videomulluunniit immiussat illit piumassuserinngisannik avitseqatigiissutaasimanerat paasiviuk? Tamataqanngitsut assinginik avitseqateqarsimasinnaavutit. Imal. kanngutaatsuliorfigineqarlutit nikassarneqarlutilluunniit. Illit misigisannik misigisaqarsimanerup inuit ilaannut qanoq misinnarnera uani atuarsinnaavat. Pisup ilinnit qanoq iliuuseqarfigisinnaaneranut tunngasoq aamma atuarsinnaavat.

Piumassuserinngisamik paasissutissat inummut namminermut tunngasut assillu inuup inuuneranut tunngalluinnartut avitseqatigiissutaanerat taama misinnarsinnaavoq

Paasissutissanik killissamik qaangiisunik inummulluunniit namminermut tunngasunik, assinik videomulluunniit immiussanik avitseqatigineqarnerup qisuariarfigineqartarnera assigiinngeqaaq. Ilaasa qaangilertortarpaat allallu anigoruminaatsitaminnik nalaataqarneq annertooq tarnillu pissusaanik immikkut ilisimasalimmit ikiorneqartariaqarneq misigisarlugu.

Illit pisumut qisuarininnut assigiinngitsorpassuit apeqqutaasinnaapput. Ass. suup, sumi qanorlu annertutigisumik avitseqatigiissutaasimanera pingaaruteqarsinnaavoq. Avitseqatigiissutaasup qanoq allanit oqaaseqarfigineqarnera qisuariarnermut aamma apeqqutaasinnaavoq. Kia taamaaliornera aamma apeqqutaasinnaavoq.

Qisuariarneq aamma tamatuma nalaani qanoq innermit tamatumalu saniatigut nikassarneqarnermik allanillu oqimaatsunik misigisaqarnermit sunnerneqarsinnaavoq.

Asseq inuup inuuneranut tunngalluinnartoq tamanut saqqummiunneqarsimappat imminut pisuutinneq, kanngusunneq tatiginnigunnaarnerlu misigineqarsinnaapput. Imminut pisuutinneq arlaatigut imminut nittarsaannissamut peqataasimasutut misinnarmat. Kanngusunneq nakkutigisinnaanngisamik tamanut nittarsaannerummat. Tatiginnikkunnaarnerlu inuk ataaseq arlallilluunniit qanigisat, assinik filmilianilluunniit avitseqatigiinnerni peqataagajummata taamaammallu tatigineqarsinnaanngimmata.

Illit eqqunngitsuliorsimannginnerpit eqqaamanissaa pingaaruteqarluinnarpoq. Akuerineqaqqaarani avitseqateqarsimasoq akisussaavoq – illit pisuunngilatit.

Apereqqaarnat imal. allatut malersorlutit allat assinnik avitseqateqarsimanerat eqqortuunngilluinnarpoq. Taamaaliorneraq eqqortuunngilaq inatsisinillu uniuinerusinnaalluni.

Eqqarsaatigalugu ilungersunarnera qularnanngilaq eqqaamajulli taamaattussaanngitsutut massakkorpiaq misinnaraluaq piffissap ingerlanerani inuuneq ingerlaqqissammat.

Massakkorpiaq assit avitseqatigiissutaasut iliuuseqarfiginissaat immaqa anigorneqarsinnaanngilluinnartutut misinnarsinnaavoq. Taamaattorli assimik siammarterineq annikilliniarlugu pilertortumik iliuuseqarnissaq isumassarsiatsialaavoq.

Ilitsersuut: assit piiartikkit – tulleriiaarlugit

Oqaloqateqarnissaq pingaaruteqarpoq

Misigissutisit kisimiillutit ersussanngilatit.

Taamaattut kisimiilluni ersunnagit oqaloqatigiissutiginissaat amerlanernut iluaqutaangaartarpoq. Inersimasumik ataqqinassutsimik innarliisunik unititsinissamut ilungersunarneranillu illit ataqqinassusinnik innarliisumut erseqqissaanissamut ikiuussinnaasumik tulaaveqarsinnnaanerit annertuumik sunniuteqarsinnaavoq.

Tamatuma saniatigut pisup kingorna inersimasup aamma tapersersorsinnaavaatit. Ikinngummik oqaloqateqarneq naak taanna tuppallersaasinnaallunilu paasinnissinnaagaluaq, tamatigut tamatuma assinganik eqqissisitsisanngilaq.

Assimik allamilluunniit killissamik qaangiisumik imalimmik piumassuserinngisannik avitseqateqarnermik misigisaqarsimasumik ikinnguteqaruit, tamatuminnga inersimasumut oqaluttuarnissaannut tapersersukkit.