Chat Paaralugu
Chat Paaralugu qarasaasiakkut attaveqaataavoq, tassuuna meeqqat, inuusuttut, angajoqqaat atorfilittallu siunnersorneqarsinnaallutillu ilitsersorneqarsinnaasassapput, meeqqat inuusuttullu qanoq toqqissisimanartumik nittartakkamik atuisinnaanissaat pillugu. Meeqqat, inuusuttut angajoqqaavisalu siunnersorneqarnerisa ilitsersorneqarnerisalu saniatigut aamma 1.-3. klassenut, 4.-7. klassenut aammalu 8. – 10. klassenut atuartitsissutissanik nittartagaq imaqartussaavoq. Atuartitsissutit taakkua atorfilinnit allanillu aaneqarsinnaasussaapput. Chat Paaralugu ullumikkut aamma meeqqat atuarfiisa intranetsiini nassaassaavoq.
Meeqqat siusinnerpaamik nittartakkami atuisutut pitsaasumik ileqqoqaliaarnissaat pingaaruteqaqaaq. Taamaattumillu nittartakkakkut avataanilu pitsaasumik oqaloqatigiissinnaanissaq eqqumaffigisussaallugu toqqarsimavarput, soorluttaaq spil’it nittartakkamilu assinut tunngatillugu ileqqorissaarnissamut tunngasut aamma samminiarlutigit. Atuartitsissutit suliarineqarsimasut ilinniartitsisut nittartakkatigut toqqissisimanartumik attaveqartarnissaq pillugu eqqartuinissaannut iluaqutaasussaapput.
Angajoqqaarpassuit misigisarpaat meeqqatik nittartakkamik atuisuugaangata eqqarsaatigisassarpassuaqartoq, namminnerlu maligassiuinissartik qanoq pingaaruteqartiginersoq angajoqqaarpassuarnit paasineqarnissaa pingaaruteqarluinnarpoq. Assit qanoq piiarneqarsinnaanerat allallu nittartakkatigut attaveqaatit atornerannut tunngasut pillugu erseqqissunik siunnersuuteqartartussaavugut.
Chat Paaralugu 2018-imi septembarimi saqqummersinneqarpoq, nittartakkatsinnilu uani taanna nassaassaavoq. Chat Paaralugu Kalaallit Nunaanni pinerluttaalisitsinermut Siunnersuisoqatigiit PiSiu suleqatigalugit suliarineqarpoq.