Immikkut iliuuseqarfissatsinnik marlunnik toqqaavugut:
Iliuuseqarfissat taakku marluk, nunatsinni MIO-mi/meeqqat illersuisuanni sms-erluni siunnersuisarfimmik, meeqqat inuusuttullu kinguaassiuutitigut innarliinerit nikassaanerlu pillugit saaffigisarnerusaannik naliliineq aallaavigalugu, toqqarpagut.
Nikassaaneq
Nikassaaneq nunatsinni qangali ajornartorsiutaavoq, ukiullu kingulliit tallimat qulillu akornanni nalunaarusiat amerligaluttuinnartut nikassaanerup nunatsinni quarsaarnartumik akulikinnera ersarissumik oqaatigimmassuk, immikkut sammineqarluni.
Meeqqat atuartut pissusilersuutaat peqqissutsimut sunniutillit pillugit Ilisimatusaqatigiit (HBSC) nunatsinni immikkoortortaata nalunaarusiaa nunatsinni meeqqat inuusuttullu akornanni nikassaanerup annertuumik atugaaneranik uppernarsaasoq 2015-imi ukiakkut tamanut saqqummiunneqarpoq. Meerarpassuit atuarfimmi, meeqqerivinni inuillu internetsikkut attaveqartigiittarfiinissaaq annertusiartuinnartumik nikassarneqartarnerat, misissuinerup takutippaa.
Nalunaarusiat nikassaasarnerup nunanut allarpassuarnut sanilliullugu nunatsinni akulikitsunik atugaaneranik uppernarsaasut HSBC-ip siusinnerusukkut tamanut saqqummiuppai.
2018-imi Aarhusip Universitetiani inuit inuiaqatigiillu inuttut inooqatigiinnerannik ilisimasalik Helle Rabøl Hansen nunatsinni nikassaasarnermut patsisaasunik misissuilluni aallartippoq. Marsi qaammat 2018 pilersaarusiornermut atatillugu meeqqanik, angajoqqaanik ilinniartitsisunillu apersuinerit arlallit aallaavigalugit, meeqqat inuttut atukkatigut sanngiiffeqartut nikassarneqartarnerat paasinarsisoq, oqaatigaa.
Kinguaassiuutitigut innarliinerit
FN-ip meeqqat pillugit ataatsimiititaliaata nunatsinni meeqqanik kinguaassiuutitigut innarliisarnerup annertussusaata ernumanarnera tamanut saqqummiuppaa. Nunatta, Savalimmiut Danmarkillu 2017-imi septembari qaammat Genève-imi FN-ip meeqqat pillugit ataatsimiititaliaanit misissuisitsinerup kingorna innersuussutit inerniliinerillu saqqummiunneqarnerannut atatillugu taamaaliortoqarpoq.
Tamatuma saniatigut nalunaarusiaq Unge i Grønland, atoqatigiinnermik kinguaassiuutitigullu innarliisarnermik immikkut sammisalik danskit Socialforskningsinstitutiata 2015-imi tamanut saqqummiuppaa. Misissuinerup nalunnaarusiami tunngavigineqartup nunatsinni meeqqat inuusuttullu ilarpassuisa kinguaassiuutitigut innarligaasimanerat takutippaa.
